Ènne paidge de l’hichtoire de Rome

Çt’ Ida ât raicoédgeaire d’hichtoire â s’condaire. Èlle ât coégnue po étre chtrèngue. Ès en sont en l’Antitytè. Aivaint que d’ porcheudre, èlle veut s’aichuraie qu’ les éyeuves aint bïn r’teni.

- Âdj’d’heû, i vôs veus quèchtionnaie chu l’hichtoire de Rome que nôs ains traitèe lai driere yeçon èt qu’i vôs aî d’maindè d’ révijaie. Dis-me voûere, Moûeri, tiu ç’ât qu’é assaichinè Jules César ?
- Ç’ n’ât p’ moi.
- Moûeri, t’ n’ès p’ vergangne de m’ répondre dïnche ?
- I vôs djure, Daime, i n’aî ran è voûere d’aivô çoli.
- Moûeri, en quélle hoûere ât-ce qu’è rentre, ton pére ?
- És chés.
- I m’en veus allaie l’ trovaie.

Le meinme soi, èlle dichcute d’aivô le pére:
- I aî d’maindè en vot’ boûebe tiu qu’é assaichinè Jules César. È m’é réponju que ç’ n’était p’ lu. È n’aivait p’ fait ses daivois, bon, mains l’ pé, ç’ât qu’è s’ât fotu d’ moi. Tote lai tyaisse s’ât touêju d’ rire. Ïn pô d’ rèchpèt, tot d’ meinme !
- Écoutèz, Daime, mon boûebe é bïn des défâts. Ç’ât ïn feignant, ïn peuri, ïn croûeye éyeuve. Mains ç’ n’ât p’ïn mentou. Encoé moins ïn aissaichïn. S’è vôs é dit que ç’ nât p’ lu, vôs peutes le craire.

Retrouvez et écoutez l’article complet et lisez sa traduction sur https://www.image-jura.ch/djasans/spip.php?rubrique228